အိမ်ရောင်း၍ရသည့်ငွေ တနာရီအတွင်း အလစ်သုတ်ခံရမှု မြောက်ဥက္ကလာမြို့နယ်တွင်ဖြစ်ပွား - Reader Myanmar

Latest Posts

အိမ်ရောင်း၍ရသည့်ငွေ တနာရီအတွင်း အလစ်သုတ်ခံရမှု မြောက်ဥက္ကလာမြို့နယ်တွင်ဖြစ်ပွား





မြောက်ဥက္ကလာမြို့နယ် ခြောက်ကွေ့ CB ဘဏ်တွင် အိမ်ရောင်း၍ ရလာသည့်ငွေကို ဘဏ်လာအပ်စဉ် ကားပေါ်၌ ထားရှိသည့်ငွေထုပ်အား အလစ်သုတ်ခိုးယူမှုတခု ဧပြီ ၅ ရက် နေ့ခင်းပိုင်းတွင် ဖြစ်ပွားခဲ့သည်။
ကာယကံရှင်ဦးကျော်စိုးက ''အိမ်ရောင်းပြီးလို့ တနာရီမကြာဘူး။ ဘဏ်မှာ ငွေသွားလွှဲမယ်ဆိုပြီး လုပ်တယ်။ ပါတာက ငွေထုပ်နှစ်ထုပ်၊ သိန်း ၁၂၀ ကို ဘဏ်မှာ အပ်နေတဲ့ အချိန် ကျန်တဲ့ ၁၂၇ သိန်းကို ကျွန်တော့်အမျိုးသမီးကိုပေးပြီး ကားပေါ်ကနေစောင့်ဖို့ ပြောလိုက်တယ်။ အမျိုးသမီးက ငွေထုပ်ကားပေါ်ကို ယူသွားတယ်။ ကားပေါ်မှာ ပူလို့ဆိုပြီး ခဏလေးအောက် ဆင်းလိုက်တဲ့အချိန်မှာ ဆိုင်ကယ်နဲ့ လူနှစ်ယောက်က ကားပေါ်ကငွေကို အတင်းယူပြီး ထွက်ပြေးသွားတာ''ဟု News Watch သို့ ပြောသည်။
ယင်းကဲ့သို့ ကားပေါ်တွင် တင်ထားသည့် ငွေကြေးအား ခိုးယူသည့်အချိန်တွင် ကားပေါ်၌ အဘွားကြီးတဦးနှင့် ကလေးငယ်တဦးရှိနေပြီး ကားနှင့်မလှမ်းမကမ်းတွင်လည်း ဦးကျော်စိုး၏ဇနီး ရှိနေသည် ဟု ဆိုသည်။ ''ယူပြီး ပြေးတဲ့အချိန်မှာ ကားပေါ်က သမီးကအော်တယ်။ သူ့အမေက သိသိချင်းပြေးလိုက်တော့ ဆိုင်ကယ်နဲ့ဆိုတော့ မမီဘူးလေ။ အဲဒီနားမှာရှိတဲ့ ဆိုင်ကယ်၊ ကယ်ရီသမားနှစ်ယောက်က တယောက်တစီးနဲ့လိုက်တယ်။ နီးလာတဲ့အခါ ယူပြေးတဲ့သူက ခြေထောက်နဲ့ ကန်တယ်။ နောက် ဓားထုတ်ပြတော့ ဆက်မလိုက်ရဲဘူး ဖြစ်သွားတာ''ဟု ဆိုသည်။
ပိုက်ဆံယူ၍ ထွက်ပြေးသွားသူ နှစ်ဦးသည် ရွှေပေါက်ကံအ၀င်ရှိ တံတားအနီး ဘုန်းကြီးကျောင်းရှေ့တွင် ဆိုင်ကယ် ချိန်းပြတ်၍ ဆိုင်ကယ်ကို ထားခဲ့ကာ ခြေလျင်ထွက်ပြေးသွားသည်ဟု ဆိုသည်။ ''ပိုက်ဆံခိုးသွားတဲ့သူတွေရဲ့ ဆိုင်ကယ်က အခုရဲစခန်းမှာရောက်နေပြီ၊ ရဲတွေလည်း တိုင်ချက်ဖွင့်ကတည်းက အားတက်သရော တရားခံဖမ်းဆီးနိုင်ရေးလုပ်ပေးပါတယ်'' ဟု ဦးကျော်စိုးက ပြောသည်။
ဦးကျော်စိုးသည် မြောက်ဥက္ကလာနေအိမ်အား ရောင်းချပြီး ဧရာဝတီတိုင်းဒေသကြီး မော်ကျွန်းသို့ ပြန်ကာ ကျူရှင်ဘော်ဒါဖွင့်ရန် ရည်ရွယ်ထားသည်ဟု ဆိုသည်။ ယင်းကြောင့် အိမ်ရောင်းချအပြီး တနာရီမပြည့်ခင် အချိန်တွင် မြောက်ဥက္ကလာခြောက်ကွေ့ CB ဘဏ်သို့ သွားအပ်စဉ် အိမ်ရောင်းရငွေ တ၀က်ကျော်ကျော် ခိုးယူခံလိုက်ရခြင်းဖြစ်သည်ဟု ဆိုသည်။
ကိုခက်
News Watch


Loading...