ကိုဖီအာနန်ဦးဆောင်သည့် ရခိုင်ပြည်နယ်ဆိုင်ရာကော်မရှင် အကြံပြုအစီရင်ခံစာ ထုတ်ပြန် - Reader Myanmar

Latest Posts

ကိုဖီအာနန်ဦးဆောင်သည့် ရခိုင်ပြည်နယ်ဆိုင်ရာကော်မရှင် အကြံပြုအစီရင်ခံစာ ထုတ်ပြန်






အကြမ်းဖက်မှုများ ပပျောက်အောင်ဆောင်ရွက်ရန်နှင့်
လူ့အခွင့်အရေးချိုးဖောက်မှုကျူးလွန်သူများကို တာဝန်ယူ၊ တာဝန်ခံစေဖို့ ရခိုင်ပြည်နယ်မှာရှိတဲ့ ရဲလုံခြုံရေးတပ်ဖွဲ့များကို လူ့အခွင့်အရေးသင်တန်းပေးရန် ကိုဖီအာနန်ဦးဆောင်သည့် ရခိုင်ပြည်နယ်ဆိုင်ရာ အကြံပေးကော်မရှင်က အကြံပြုလိုက်ကြောင်း သိရသည်။
မတ် ၁၆ ရက်က ရန်ကုန်မြို့ ရှန်ဂရီးလားဟိုတယ်တွင် ပြုလုပ်သည့် အစိုးရထံတင်သွင်းမည့် ကြားဖြတ်အစီရင်ခံစာပါ အကြံပြုချက်များနှင့်ပတ်သက်ပြီး ကော်မရှင်အဖွဲ့ဝင်များက မီဒီယာများကို ရှင်းလင်းပြောကြားရာတွင် ယခုကဲ့သို့ ပြောကြားခဲ့ခြင်းဖြစ်သည်။
အစိုးရသို့ တင်သွင်းမည့် အကြံပြုချက်များထဲတွင် လူသားချင်းစာနာမှုအကူအညီပေးနေသည့် အဖွဲ့အစည်းများကို ရခိုင်ပြည်နယ်တွင် လွတ်လပ်စွာကူညီသွားလာခွင့်ပေးရန်၊ ပြည်တွင်းပြည်ပမှ သတင်းမီဒီယာနှင့် သတင်းထောက်များကို လွတ်လပ်စွာ သတင်းယူခွင့်ပေးရန်တို့ ပါဝင်ကြောင်း သိရသည်။
ထို့အပြင် ဒုက္ခသည်များ မိမိတို့သဘောဆန္ဒအလျောက်ပြန်ချင်ပါက စိစစ်ပြန်လွှတ်ပေးရန်အတွက် ပူးပေါင်းကော်မတီတစ်ခုဖွဲ့စည်းရန်နှင့် ထိုဒေသတွင် ဖြစ်ပေါ်နေသော တရားမ၀င်ကုန်သွယ်ရေးများကို တားဆီးရန်ကိုလည်း အကြံပြုထားကြောင်း သိရသည်။
ကျန်းမာရေးနှင့် ပညာရေးကဏ္ဍများတွင် အားလုံးညီမျှမှုရှိအောင်လုပ်ဆောင်ရန်၊ နိုင်ငံသားဖြစ်ခွင့်ရှိသူများကို နိုင်ငံသားအနေဖြင့် အသိအမှတ်ပြုပြီး နိုင်ငံသားအခွင့်အရေး ခံစားခွင့်ပေးရန်နှင့် ဒုက္ခသည်စခန်း ၃ ခုကို ပိတ်သိမ်းရန်လိုအပ်နေပြီး တယောက်နှင့်တယောက် အမုန်းပွားအောင်ပြောနေသူများကိုလည်း အရေးယူရန် ကော်မရှင်က တိုက်တွန်းထားကြောင်း သိရသည်။
ကြားဖြတ်အစီရင်ခံစာတွင် ရခိုင်ပြည်နယ်ရှိအခြေအနေများ တိုးတက်လာစေရန် အစိုးရအနေဖြင့် လတ်တလောအကောင် အထည်ဖော်နိုင်မည့် အကြံပြုချက်များပါဝင်မည်ဖြစ်ပြီး နောက်ဆုံးအဆင့်အစီအရင်ခံစာတွင် ရေရှည်အကောင်အထည် ဖော်နိုင်မည့် အကြံပြုချက်များပါဝင်မည်ဖြစ်ကြောင်း သိရသည်။
ကုလသမဂ္ဂအထွေထွေအတွင်းရေးမှူးဟောင်း မစ္စတာ ကိုဖီအာနန် ဦးဆောင်သည့် ရခိုင်ပြည်နယ်ဆိုင်ရာ အကြံပေးကော်မရှင်ကို နိုင်ငံတကာမှ ပညာရှင်သုံးဦးနှင့်ပြည်တွင်းပညာရှင်ခြောက်ဦးတို့ဖြင့် ၂ဝ၁၆ သြဂုတ် ၂၄ ရက်က နိုင်ငံတော်အတိုင်ပင်ခံရုံးမှဖွဲ့ စည်းခဲ့ခြင်းဖြစ်ပြီး ရခိုင်ပြည်နယ် ပဋိပက္ခများနှင့်ပတ်သက်ပြီး တွေ့ရှိချက်များကို နိုင်ငံတော်၏အတိုင်ပင်ခံပုဂ္ဂိုလ်မှတစ်ဆင့် အစိုးရထံတင် ပြရမည်ဖြစ်ကြောင်း သိရသည်။

Image may contain: 1 person, screen

Image may contain: 5 people, people sitting and indoor

Image may contain: 4 people, people sitting, table and indoor

Image may contain: 4 people, people sitting, table and indoor




Loading...