အင်တာနက် သုံးစွဲသူတွေ သိသင့်တဲ့ ဆက်သွယ်ရေး ဥပဒေ ပုဒ်မများ - Reader Myanmar

Latest Posts

အင်တာနက် သုံးစွဲသူတွေ သိသင့်တဲ့ ဆက်သွယ်ရေး ဥပဒေ ပုဒ်မများ






ဆက်သွယ်ရေး ဥပဒေနဲ့ အင်တာနက် သုံးစွဲသူတွေကို အရေးယူတဲ့အကြောင်း သတင်းတွေ ဖတ်ရ၊ ကြားရပေမယ့် ဘယ်ပုဒ်မနဲ့ အရေးယူတယ်၊ ဘယ်ပြစ်မှု ပြစ်ဒဏ်တွေ ရနိုင်တယ်ဆိုတာ သေချာမသိကြဘဲ ဖြစ်နေပါတယ်။ ဒါကြောင့် အင်တာနက် သုံးစွဲသူများ မဖြစ်မနေ သိထားရမယ့် ဆက်သွယ်ရေး ဥပဒေ ပုဒ်တွေက ၆၆ (ဂ)၊ ၆၆ (ဃ)နဲ့ ၆၈ (က)၊ ၆၈ (ခ) တို့ အကြောင်း ဖော်ပြပေးလိုက်ပါတယ်။ တကယ်တမ်းမှာတော့ ဒီဆက်သွယ်ရေး ဥပဒေ ပုဒ်မတွေဟာလည်း အငြင်းပွားဖွယ်ရာ  ဖြစ်ပါတယ်။

ဆက်သွယ်ရေး ဥပဒေ ပုဒ်မ ၆၆(ဂ) မှာ ဖော်ပြထားတာက “ဆက်သွယ်ရေး ကွန်ရက်ကို အသုံးပြု၍ ငွေကြေးနှင့် ပစ္စည်း တစ်ရပ်ရပ်ကို ခိုးယူခြင်း၊ လိမ်လည်ခြင်း၊ အလွဲသုံးစား ပြုခြင်း သို့မဟုတ် ပျက်စီးစေခြင်းများ” ဖြစ်ပါတယ်။

ပုဒ်မ ၆၆ (ဃ) မှာ ဖော်ပြထားတာက “ဆက်သွယ်ရေး ကွန်ရက်တခုခုကို အသုံးပြု၍ ပုဂ္ဂိုလ်တဦးဦးအား ခြောက်လှန့်တောင်းယူခြင်း၊ အနိုင်အထက် ပြုခြင်း၊ မတရား တားဆီးကန့်ကွက်ခြင်း၊ အသရေဖျက်ခြင်း၊ နှောင့်ယှက်ခြင်း၊ မလျော်သြဇာသုံးခြင်း သို့မဟုတ် ခြိမ်းခြောက်ခြင်း” တခုခုကို ကျူးလွန်ပါက ထောင်ဒဏ် ၃ နှစ်၊ (သို့မဟုတ်) ငွေဒဏ် (သို့မဟုတ်) နှစ်ရပ်စလုံး ကျခံရမည်လို့ ဖော်ပြထားပါတယ်။
ပုဒ်မ ၆၈(က) မှာ ဖော်ပြထားတာကတော့ “မမှန်ကန်သော သတင်းအချက်အလက်ကို မရိုးမဖြောင့်သော သဘောဖြင့် ဆယ်သွယ်ခြင်း၊ ဖမ်းယူခြင်း၊ ပို့လွှင့်ခြင်း၊ ဖြန့်ချိခြင်း သို့မဟုတ် ပေးဝေခြင်း သို့မဟုတ် ပါဝင်ဆောင်ရွက်ခြင်း” ဖြစ်ပါတယ်။

ပုဒ်မ ၆၈(ခ) မှာ ဖော်ပြထားတာက “သတင်းအချက်အလက် ပို့လွှင့်ခြင်း၊ ဖမ်းယူခြင်း၊ ဆက်သွယ်ခြင်း၊ ပေးဝေခြင်း သို့မဟုတ် ဖြန့်ချိခြင်းကို ခွင့်ပြုချက်မရှိဘဲ တားမြစ်ခြင်း၊ တားဆီးပိတ်ပင်ခြင်း သို့မဟုတ် နှောင့်ယှက်ခြင်း” တခုခု ကျူးလွန်ပါက ထောင်ဒဏ် ၁ နှစ် (သို့မဟုတ်) ငွေဒဏ် (သို့မဟုတ်) ဒဏ်နှစ်ရပ်လုံး ကျခံရမည်လို့ ဖော်ပြထားပါတယ်။

၂၀၁၅ ဒီဇင်ဘာလတုန်းက မအူပင်မြို့နေ အသက် ၂၅ နှစ်အရွယ် မချောစန္ဒီထွန်း (ခ) ချစ်သမီး  ဟာ အမျိုးသားဒီမိုကရေစီ အဖွဲ့ချုပ် ဥက္ကဋ္ဌ ဒေါ်အောင်ဆန်းစုကြည်ရဲ့ ထဘီအရောင်နဲ့ စစ်တပ်က အသစ်ပြောင်းလိုက်တဲ့ စစ်ဝတ်စုံအရောင်တို့ကို ဖေ့စ်ဘုတ်မှာ နှိုင်းယှဉ် ပြောဆိုတယ်ဆိုပြီး မအူပင်မြို့နယ် တရားရုံးက ဆက်သွယ်ရေး ပုဒ်မ ၆၆ (ဃ) နဲ့ ထောင်ဒဏ် ၆ လ ချမှတ်ခဲ့ပါတယ်။

၂၀၁၆ ဇန်နဝါရီလမှာလည်း တပ်ချုပ် ဗိုလ်ချုပ်မှူးကြီး မင်းအောင်လှိုင်ကို လှောင်ပြောင်သရော်တဲ့ပုံကို ဖေ့စ်ဘုတ် လူမှုကွန်ရက်မှာ ရှယ်ခဲ့တယ်ဆိုပြီး ဦးပက်ထရစ် ခွန်ဂျာလီကို ရန်ကုန်တိုင်း၊ လှိုင်မြို့နယ် တရားရုံးက ဆက်သွယ်ရေးပုဒ်မ ၆၆ (ဃ) နဲ့ ထောင်ဒဏ် ၆ လ ချမှတ်  ခဲ့ပါသေးတယ်။

ဒေါ်အောင်ဆန်းစုကြည် ဓာတ်ပုံကို ညစ်ညမ်းပုံအဖြစ် ပြင်ဆင်ပြီး ဖေ့စ်ဘုတ်ပေါ် တင်တယ်ဆိုပြီး တရားစွဲခံနေရတဲ့ ဧရာဝတီတိုင်း၊ ကန်ကြီးထောင့်မြို့နယ်က ကြံ့ခိုင်ရေးပါတီ ခေါင်းဆောင် ဦးသန်းထွန်း အမှုကိုတော့ မတ်လ ၂၅ ရက်နေ့မှာ အပြီးသတ် အမိန့်ချ  မှာ ဖြစ်ပါတယ်။

မချောစန္ဒီထွန်းနဲ့ ဦးပက်ထရစ် ခွန်ဂျာလီ အမှုမှာတုန်းက အာမခံ မပေးဘဲ ဖမ်းဆီးချုပ်နှောင်ထားခဲ့ပြီး ကြံ့ခိုင်ရေးပါတီက ဦးသန်းထွန်းကိုတော့ အစောပိုင်းမှာ အာမခံ ပေးခဲ့တာကြောင့် ဝေဖန်မှုတွေလည်း ထွက်ပေါ်ခဲ့ဖူးပါတယ်။

“ဖေ့စ်ဘုတ်တွေမှာ ရေးနေတဲ့သူတွေကို ကျနော်တို့ ရဲတပ်ဖွဲ့က စောင့်ကြည့်လေ့လာဖို့ မလုပ်ပေမယ့် နစ်နာသူဘက်က သူဘယ်လို နစ်နာပါတယ်လို့ တိုင်ကြားလာမယ် ဆိုရင်တော့ ဥပဒေကြောင်းအရ အရေးယူ ဆောင်ရွက်မယ်။ လက်ရှိမှာလည်း အရေးယူနေတဲ့ ဖြစ်စဉ်တွေ ရှိတယ်။ နစ်နာသူရှိမယ်ဆိုရင် ဆောင်ရွက်ပေးမယ်” လို့ ရန်ကုန်တိုင်းဒေသကြီး ရဲတပ်ဖွဲ့ ရဲမှူးကြီး ဝင်းဗိုလ်က ဧရာဝတီကို ပြောကြား ဖူးပါတယ်။

အေဘယ်လ်
ဧရာဝတီ
Loading...